Standard Operating Procedure (SOP) Akademiku Fakuldade Engenharia - UNDIL

Definisaun:

Orientasaun Monografia maka prosesu mentorizasaun / akompanhamentu ba estudante sira durante hakerek sira nia monografia husi orientador sira. Objetivu maka atu orienta estudante sira hodi kompleta sira nia monografia tuir padraun akadémiku no prinsípiu peskiza ne'ebé aplikavel, no mós atu ajuda sira ultrapasa obstákulu oioin iha prosesu peskiza no hakerek monografia. 

Rekizitu Jerál:

1. Estatutu hanesan estudante ativu iha semestre atuál.
2. Estudante hetan ona atribuisaun ba orientador monografia (Orientador prinsipál no ko- orientador).
3. Orientador monografia sira simu ona karta nomeasaun nu’udar orientador monografia.
4. Orientador monografia ida-idak tenke orienta ka superviziona másimu sesaun 12 to’o estudante kompleta monografia no to’o iha faze ezame monografia.
5. Períodu orientasaun monografia mak semestre ida (fulan 6) tuir karta nomeasaun orientasaun monografia nian.
6. Karik estudante seidauk kompleta monografia iha semester ida nia laran (fulan 6), estudante refere tenki renova karta nomeasaun orientasaun monografia nian.
7. Prosesu no kriteria sira ba renovasaun karta nomeasaun orientasaun monografia nian determina hosi departamentu ida-idak no tenki hetan hunhesementu no aprovasaun husi Fakuldade.

Etapa Prosedimentu:

1. Estudante foti karta nomeasaun orientasaun monografia nian hosi administrasaun departamentu nian.
2. Estudante sira foti sira nia Ficha Konsultasaun Monografia husi administrasaun departamentu.
3. Estudante sira tenke entrega sira nia karta nomeasaun orientasaun monografia ba sira nia orientoador monografia ida-idak.
4. Hafoin entrega sira nia karta nomeasaun orientasaun monografia nian, estudante sira tenke koordena ho sira nia orientador monografia nian kona-ba tempu, substánsia, no prosedimentu sira ba sesaun orientasaun monografia nian.
5. Wainhira halo konsultasaun monografia, estudante sira tenke lori sira nia ficha konsultasaun monografia ba sira nia orientador monografia.
6. Etapa jerál sira husi orientasaun monografia nian maka hanesan tuir mai: Orientasaun Inisiál: Iha faze ida-ne’e, estudante sira tenke prepara esbosu / draft inisiál, inklui introdusaun, formulasaun problema, limitasaun problema, objetivu peskiza, benefísiu peskiza, nst. Orientasaun Teórika: Iha faze ida-ne'e, estudante sira presiza atu prepara esbosu / draft teóriku ida ba sira nia monografia, tantu iha forma revizaun jornál nian ka sitasaun teórika hosi livru sira. Orientasaun Métodu: Iha faze ida-ne'e, estudante sira presiza atu prepara esbosu / draft métodu peskiza nian ida ne'ebé relasiona ho sira nia monografia. Orientasaun ba Rezultadu: Iha faze ida-ne'e, estudante sira tenke prepara manuskritu kompletu ida hosi sira nia rezultadu peskiza monografia nian ba sira nia orientador.
7. Iha kondisaun balu, departamentu ida-idak bele ajusta ka aumenta etapa orientasaun sira, hanesan ezame proposta no ezame rezultadu peskiza nian.
8. Karik estudante liu ona períodu orientasaun fulan neen / semester 1 no seidauk to’o iha faze ezame monografia nian, orientador labele atu fó orientasaun to’o estudante refere renova karta nomeasaun orientasaun monografia nian.
9. Karik estudante liu ona períodu orientasaun fulan neen / semester 1 no seidauk to’o iha faze ezame teze, estudante ne’e tenke submete renovasaun karta nomeasaun orientasaun monografia ba administrasaun departamentu liuhosi aprezenta karta nomeasaun orientasaun monografia anteriór.
10. Hafoin kompleta etapa hotu-hotu, estudante iha direitu atu submete ezame monografia ba departamentu. 

Parte Relevante:

1. Dosente Orientador Monografia
2. Administrasaun Departamentu
3. Estudante

Dokumentus Nesesariu:

1. Ficha Konsultasaun Monografia
2. Karta Nomeasaun Orientasaun Monografia