Standard Operating Procedure (SOP) Akademiku Fakuldade Engenharia - UNDIL

Definisaun:

Ezame Monografia hanesan ezame naktaka hodi responsabiliza no defende rezultadu peskiza ne’ebé hala’o ona konsellu ezaminadór nia oin ne’ebé kompostu husi ezaminadór 1, 2 no 3. Ezame/defeza monografia hanesan pasu ikus liu hafoin estudante sira liu tiha ona aulas aprendijagem tinan barak no gasta tempu iha kompilasaun siénsia ka obra ba monografia refere.

Rekizitu Jerál:

1. Estatutu hanesan estudante ativu iha semestre atuál.
2. Hala’o ona orientasaun akadémika iha semestre atuál.
3. Estudante sira tenke iha estatutu livre husi teoria.
4. Kompleta ona prosesu konsultasaun monografia tomak ho orientador.
5. Kompleta ona obrigasaun administrativa no finanseira hotu Universidade Dili nian.

Etapa Prosedimentu:

1. Estudante sira tenke kompleta prosesu orientasaun monografia tomak ho orientador monografia rua no hetan ona lisensa ba faze ezame monografia nian.
2. Estudante sira hatama pedidu ezame monografia ba Administrasaun Departamentu.
3. Administrasaun Departamentu submete pedidu ezame monografia estudante nian ba Xefe Departamentu hodi determina ekipa ezame no tempu ezame tuir regulamentu aplikavel.
4. Durante prosesu pedidu, Administrasaun Departamentu presiza verifika dokumentu administrativu hotu-hotu hanesan karta livre husi teoria, KPRH (kompleta pagamentu orsamentu monografia), FPE (foti kursu monografia iha semestre atuál) no ficha konsultasaun orientasaun monografia ne’ebé hateten katak orientador rua konkorda ho ezame monografia.
5. Karik rekizitu dokumentu ida la prienxe, estudante sira sei la hetan lisensa atu tuir ezame monografia nian.
6. Depois dokumentu hotu prenxe no simu ona konfirmasaun husi Xefe Departamentu ba Oráriu Ezame no ekipa ezaminadór, Administrasaun Departamentu sei hasai karta konvite ezame monografia ba ekipa ezaminadór ne’ebé kompostu husi ezaminadór na’in 3 (Ezaminadór Prinsipál, Ezaminadór II no Ezaminadór III).
7. Konvite sira ne’ebé fó sai tenke entrega ba ekipa ezaminador nian la liu loron 3 molok oras ezame nian.
8. Estudante sira tenke prepara material ezame hotu-hotu hanesan Esbosu/Draf Monografia kompletu pelumenus kopia 3, sala ezame, laptop, projetor, hahan no ekipamentu seluk tan.
9. Esbosu/ Draf ba monografia tenke submete ba ekipa ezaminador ida-idak la liu loron 3 molok oras ezame nian.
10. Iha loron ezame Monografia nian, Administrasaun Departamentu presiza atu prepara Folla Avaliasaun Monografia nian no Akta Exame ba ezaminadór ida-idak iha Ezame Monografia nian.
11. Estudante sira labele tarde ba ezame monografia.
12. Iha sala ezame monografia, so estudante ne’ebé exame no ekipa ezaminador mak iha direitu atu tama iha sala ezame.
13. Durante prosesu ezame, estudante sira tenke kumpre regra no regulamentu ezame monografia.
14. Desizaun hotu-hotu ne’ebé foti durante Ezame Monografia ne’e finál no labele kontesta husi parte ruma.
15. Karik estudante ida deklara falla / sedauk passa iha ezame monografia, estudante refere tenke hatama pedidu re-ezame / exame fila fali la tarde liu semana 2 hafoin loron ezame anteriór.
16. Estudante sira ne’ebé deklara liu ona ezame monografia ho revizaun tenke kompleta forma revizaun hotu-hotu la tarde liu semana 3 hafoin ezame monografia.
17. Valór monografia nian sei publika hafoin prosesu revizaun tomak remata no enkaderna iha forma livru monografia nian.
18. Valór monografia nian sei preense iha FRE no Transkrisaun Valor Estudante nian.

Parte Relevante:

1. Estudante
2. Dosente
3. Administrasaun Departamentu
4. Xefe Departamentu

Dokumentus Nesesariu:

1. KPRH
2. FPE
3. Karta Livre Teoria
4. Akta Exame
5. Folla Avaliasaun Monografia
6. Ficha Konsultasaun Monografia.